تاج من عياش

لما أحب أتابع أخبار التكنولوجيا وأخبار العالم .. بفتح الويب ..او الجرايد

لما أحب ألعب على الكومبيوتر ….اييييييييه …هنعيل ، ما بلعبش طبعا

لما أحب أقرأ مقالات إسلامية حلوة وأسلوبها ممتع ….فتح الله كولن ، راغب السرجاني ، هبة رؤوف ، فهمي هويدي….ناس كتيير اوي

لما أحب أكتب …قلم أسود حبر سنه رفيع نوعه بيلوت ، سارسا ، باركر ، علي ورق أبيض أو بقلم ريشه اسود برضه علي ورق أبيض بدون سطور …..وأكتب عن حاجه بحبها ….غالبا ما بقتش بكتب بالقلم كتيير

لما أحب أطبخ …ياااااااه وما أدراكم بطبيخي …فزيع يعني فزيع ….لسه عامله مكرونة بالباشاميل (أول مرة في حياتي بس طلعت رهيبة يعني ) ….فزيعه )) وان كان موضوع الطبيخ دا عادي ما بتفرقش كتيير …بيبقي مزاج يعني لو عاوزة أطبخ هدخل المطبخ وأطبخ أكيد ماحدش هيقلي لأ …وأكيد برضه مش هولع في المطبخ

لما أحب أقرأ أدب عالمي .. ماله الأدب العربي …وماله أحمد خالد توفيق يعني

لما أحب أختار قلم عشان أكتب بيه ….سارسا …بيلوت …باركر وكلهم 0.3 ، والأقلام الرصاص بسنون 0.5 ……ومابحبش الجاف علشان بيبهدل ايدي وخطي بيبقي وحش

لما أحب أعمل أي حاجة .. هو فضي ….أكيد هعمل اي حاجه

لما أحب أطلع من حالة غضب أو ضيق أو حزن ,…….بطلعه علي نفسي وأقعد أعيط …وغالبا بتقمص وأدخل أنام لحد ما أيحد ياخد باله اني بقالي سنييين نايمه وييجي يصحني ، بصحي بقي اكون نسيت

جربوا الطريقه دي فعاله جدا

لما أحب أدور على أي تسجيل إسلامي .. ما بدورش …بسأل أي حد عليه لو الموضوع أزمة أوي ربنا يخلي …جوجل

لما أحب أتكلم …هتكلم …عادي يعني

لو هتكلم في ايه ……يبقي في السياسة ، وفي الكتب وفي الكتاب وفي النت وفي الدراسه ….كفاية بقي كلام …زهقت

لما أحب أخرج …..بكره الخروج ، بس غالبا بيبقي بيت جدو …، وما بخرجش مع صحابي خالص ….لأني ندلة ومش مقتنعه بحكاية ان تلت اربع بنات ينزلوا يتمشوا في الشارع بدون هدف لو في مكان هيلمنا …ماعنديش مانع غير كدا لأ

لما أحب أقرأ مجلات .. مجلة العربي ، الزهور ،بس غالبا ما بقراش غير العربي والجرايد والكتب أكتر بكتيييييييييييير

لما أحب أمرر التاج….لاخوانية مصرية …لأمل غنيم …لأسماء العريان ….لأسماء ياسر ….لإرحم دماغك ( اللي عنده تاج ولسه ماجاوبش عليه ) …..الأستاذ محمد عبد العاطي …ياسر مدني