من زماااان اوي نفسي أدون بس فعلا مافيش لحظة عارفه اقعد فيها قدام الكمبيوتر حتي ….
والنهارده قررت ادون …
إمبارح كنت رايحه البوسته اخد حاجه ليا من هناك …وبعدين ضابط قاعد قدام البوسته ،، لقيته بيشد الوشاح اللي في الشنطة …والوشاح عبارة عن قطعه قماش خضرا كدا ومكتوب عليها ( لا اله الا الله محمد رسول الله ….الكتله الإسلامية ) وهو وشاح كانت ام نضال حطته في شنطتي ودايما بمشي بيه ،، لقيت دا بيقولي
- انتي اخوان …
أنا وداني صفرت بصراحه وراسي دخنت ….- لأ حضرتك انا سلفيين وتبع حماس ..
- انتي هتهزري
- وانا هاهزر بمناسبة ايه ؟؟ من فضلك علشان مستعجله ……دا كله وهو ماسك الوشاح ..
- تعرفي اني اقدر اعتقلك ..
ساعتها بجد والله كنت خلاص مش قادرة استحمل وهاين عليا اشتمه …دا واقف يعلق علي حته وشاح وسايب الشباب ( تييييت ) اللي واقفين في زفه المولد واقفين يلفوا سجاير ومخدرات وجاي يتشطر عليا في دي
- قلتله ،، انا كويسة كدا وعاجبني ،، حضرتك ممكن تشوف الشباب دول محتاجين حد يعتقلهم ..
وشديت من ايده الوشاح ومشيت
بس بجد كنت متضايقه اوي ،، فاكر نفسه ايه دا ..

****

إمبارح كنت راجعه من الكلية وبعدين لقيت الشوارع زحمة اوي اوي وانا مااعرفش ايه السبب ، بعد كدا اكتشفت ان في حاجه كدا اسمها زفه المولد …..مااعرفش ليه ساعتها افتكرت مقال ابراهيم عيسي ( لأجل النبي …توقفوا عن الدفاع عن النبي )
بنت ماشيه ففي ولد قالها كلمة مش كويسة خالص …تقريبا بيعاكسها …
دي لفت وشتمته ..
ودا لف وفتح علي السابع شتيمة فيها وفي اهلها لما شبع وفي الاخر بيقولها لما انتي مؤدبه اوي كدا نازلة وسط الولاد …….ليه ؟؟
اه صحيح لما هي زعلانه اوي كدا اني حد بيعاكسها ،، اللي منزلها وسط شباب تتمايع وترمي تظرة هنا وهناك ،، وكل شوية تضحك كدا بطريقة اقل مايقال عنها انها مش مزبوطة ؟؟ مش حاجه غريبة برضه ؟؟
****

أحيانا الانسان بيواجه حيطان كبييييييييرة ممكن يقف قدامها ويبص بس
واحيانا يحاول يلف …
وأحيانا يحاول ينط …
وأحيانا يخترق …
****
مااعرفش ليه لما شفت الصورة دي افتكرتها وهي ماسكة ايدي امبارح ،، وبتعديني الطريق
وماأعرفش برضه ليه بكتبها هنا …..يمكن لأني نساية ومش عاوزه انسي …..ممكن برضه …

*******
في حاجات كتييير اوي كاتباها للمدونة في الدفتر بتاعي ،، ادعولي الايام دي تعدي بسرعه علشان الحق انزلها علي المدونة …
ايام مليانة شغل كتييير
بس الواحد اول مابيشوف الزرعه بتنبت بينسي كل تعبه …
بينسي اي حاجه ضايقته …
*****
كفاية كدا النهارده علشان طولت اوي
بالله عليكم دعواتكم كتييييييييير ،، باللي ربنا يقدركم عليه ….وكمان ان ربنا يقدر لي الخير حيث كان
سلام عليكم …

سبحان الله

كنت  أتحدث مع عليا محمد عبد الغني  ابنة الدكتور محمد عبد الغني المحال للمحاكمة العسكرية السابقه ،، وعمها هو المهندس ايمن عبد الغني المحال حاليا ،، كنا نتحدث عن الإعتقالات وظروفها ،، عليا كانت بتحكي وتضحك ،، تحكي وتضحك ،، الحقيقة كنت مستغربة جدا ،، سبحان الله ربنا يبعث الابتلاء للفرد ومعه الصبر ،، أذكر يوم أن أحتجز أبي في المطار لمدة قصيرة لا تزيد بأي حال من الأحوال عن 12 ساعه ،، كنت وقتها في الخامسة من عمري ،، لكن لا زلت أذكر جيدا ماحدث ،، وأتمني لو أنساه فهو ليس سارا ً  بأي حال ٍ من الأحوال !!

ربنا يصبرهم فعلا ،، لا أتخيل أن يبتعد أبي عني ولو لحظة فقط ،، كمان إعتقال …دا يبقي علي جثتي ان شاء الله ….وعلي جثتي دا مش مجاز …دا حقيقة ..

****

نزلت أشتري جلبابات ،، (حيث أني لا أقتنع بالجيب والتيشيرتات كحجاب شرعي ) ،، ووجدت بالفعل جلبابات والعبايات ،، ولكنها تعمل بمبدأ ،، ” اللي مايشتري يتفرج ” ،، من فوقها لتحتها فصوص وترتر ،، حاجه تقرف والله ،، إنتهي الأمر بشراء القماش والتفصيل ،،

****

بفصل عند واحد من سنة اولي اعدادي ،، من ساعتها وهو بيقلي ياعسل ،، تقريبا هغير اسمي في الشهاده واخليه عسل الطويل 

المشكلة بس اني عاوزة افهمه اني بقيت في تانية جامعه يعني عسل دي مابقتش تنفع  خالص …بس علي مين ،، الراجل عنده مبدأ ،، أي حد اقل من 170 سنتي بيبقي عسل والله أعلم ،،

***

علي النقيض بقي ،، جميع التباعين والسواقين في موقف الميكروباصات  بيقولوا لي اتفضلي يادكتورة ،، ركب الدكتورة يابني ،، وأشياء علي غرار ذلك ،، في احتمال يااما انا دكتورة وانا مش واخده بالي ،، يااما انا هيبة اوي وشكلي مدكترة اوي 

*** 

ابن خالي داخل علينا واحنا بناكل اول حاجه قالها …..” كلوا وتمتعوا قليلا انكم مجرمون “    …حاجه تسد النفس والله

الحقيقة الموضوع صعب اوي
التدوين علي الوورد برس صعب شوية عن هنا …يمكن لأني لسه مااتعودتش عليه
عموما فعلا محتاجه مساعده عاجله
اللي مصبرني عليه الايموشنز بالاضافه الي اني مش هضطر لتغيير الاكونت الغبي بتاع جوجل وكمان التشجيعات …اللي جاية من بعض المدونين زي مضيعه بيتهم وبعض المدونين
ويبدو ان حمله هذا احسن جابت نتيجه معايا
وانا من هنا اطال كل المسؤلين عن هذه الحمله الشعواء بالدعم الكامل والا……..
بالاضافه ان الواحد مش قادر ينسي بيته القديم
حبيب قلبي بلوجر ..
ايوا الواحد برضه مايهونش عليه
بنت اصول من يوميييييي
عموما بجد ….احتاج دعمكم ومساندتكم بكل ماتستطيعون من قوة …
وايضا دعاء جااااااااامد اوي خالص

بداية جديده

أبدأ من هنا …..لمواكبة العصر

اكره ان يكون هناك شيء ما اجهله

ربما للإستكشاف

أتمني أن يساعدني أحد لإستجلاب مدوناتي من بلوجر لهنا ،، مع الاحتفاظ بها هناك

تغير كل مافينا …لأ لأ لأ مش كله

كتب وضاح في مدونته تدوينه يتحسر فيه علي حالنا …المايل ربما !! معلقا علي عبارة ما هي :: “” اليوم تذكرت مقولة كنت أسمعها من ممثل لا أذكر من هو , كان يقول : “شرف البنت زي عود الكبريت “.. وباتت هذه الكلمة مثل يقال بيننا , إلا أنه مع تطور دور التليفزيون وتأثره بالآخر الغربي , تم إكمال المقولة إلى : “ولكن بنات اليومين دول شرفهم زي الولاعة” طبعا ليس كل البنات . “”
لم أسمع أحدا يرددها والحمد لله ،،
ولو كنت سمعتها لحزنت جدا جدا ليس كل الفتيات …
مازال والله الخير في أمة محمد باقيا إلي الأبد ألم يقل صلي الله عليه وسلم ،،
الخير في وفي أمتي إلي يوم الدين ؟؟ وألم يقل أيضا الحياء كله خير ؟؟
مازالت والله هناك فتيات يمشين في الشارع تشعرن بالفخر …انهن مسلمات ،، مؤمنات ،، … متمسكات بحجابهن ،، متمسكات بحيائهن ،،
لا تري لهن ضحكة في الشارع مازالت هناك فتيات مسلمات مؤمنات قانتات تائبات …
لم يزل هناك خير فمثل المرأة التي تسير في الشارع وهي ( تتقصع ) قائلة ياارض اتهدي ماعليكي ادي
مازالت هناك فتيات يمشين في الشارع وحق للأرض أن تنهد فعلا …
لكنهن لا يقلنها …تنهد بايمانهن ووقارهن وعفتهن !!
مازالت هناك فتيات يخجلن وتحمر وجوههن لكلام يعتبره البعض عادي
ا مازالت هناك فتيات لا يدخلن في وسط الزحام للصراع علي كرسي في ميكروباص مهما تأخرن
مازالت هناك فتيات يغضضن ابصارهن …
مازالت هناك فتيات لا يدخلن في زحام أيا كان نوعه ،،
ومهما كانت حاجتهن اليها …
مازالت هناك فتيات يجبرن من يتعامل معهن علي احترامهن …
مازالت هناك فتيات ..
من منظرهن تعرف الترجمه العملية لكلمة جدية وإلتزام ..
مازالت هناك فتيات تفخر بهن الأمة ..!!
وعلي النقيض ..أين هم رجال الأمة ؟؟
أين هم الرجال الذين يملكون حياء عثمان بن عفان رضي الله عنه .. أهم موجودون ؟؟

—–
أنشأت مدونة جديده علي الوورد بريس …أحتاج الدعم ،، وقوات التدخل السريع ،، ويبقي ج : ا : خ

قلب ومفتوح

فاكرين الحديث بتاع
عَنْ ابْنِ عَبَّاسٍ رَضِيَ اللَّهُ عَنْهُمَا قَالَ قَالَ النَّبِيُّ صَلَّى اللَّهُ عَلَيْهِ وَسَلَّمَ: (نِعْمَتَانِ مَغْبُونٌ فِيهِمَا كَثِيرٌ مِنْ النَّاسِ الصِّحَّةُ وَالْفَرَاغُ) [رواه البخاري]

بجد الحديث دا جميل اوي وفعلا فعلا …صدق رسول الله صلي الله عليه وسلم ؟؟؟
كنت بكلم واحده صاحبتي في التليفون وبعدين خلصنا كلام …فبقلها طيب عاوزة حاجه …قالت ..لأ ،، ماتقفليش اتكلمي معايا شوية ،، اصلي مش لاقيه حد اتكلم معاه ،، بجد اتفرست …انتي فاضيه ،، غيرك مش فاضي …صحيح في ناس بحب اتكلم معاهم كتيييييير اوي وبيبقي نفسي يبقوا معايا علي طول ،، زيها مثلا ،،
بس أكيد بيبقي في حاجات بنتكلم فيها ،، مش زي دي ،، ” اي حاجه نتكلم فيها!!” ….

الرضا عن الله
بجد إحساس جميل اوي ،، انك تكون راضي بقضاء الله ….إحساس يسود نفسيتي الآن ،، أن تشعر بأنك راض ٍ عن الله ،، فيرضيك الله

زرع مثمر
هو مايحدث لي الآن ،، فقد حان موعد الحصاد وسبحان الله يحدث كله في وقت واحد ،، والحقيقة هو أجمل مما كنت أتخيل كثيرا الحمد لله يارب

السعاده …
ممكن تكون كلمة صغيرة ،، بس بجد إحساس جميل ،، إحساس بالسعاده رائع …ربما هو متعلق بالرضا ؟؟ لا أدري لكنه موجود

الحب
كلمة جميله اوي اوي
إنك تحب وتحس انهم كمان بيحبوك وحب مش مفروض عليك ،، مش لأنها معاك مثلا في الاسرة فوجب الحب …لأ ،، الشعور بحرية اختيار من تحب ،، ممكن تتخانقوا ،، تزعلوا ،، ممكن تتقمص وتمشي ،، ممكن تعيط كتيييير لأنهم عملوا حاجه ضايقتك ،، بس لأنك بتحبهم في الله ولله ،، ربما مشاعر جديده ،، زعلان ….آه ، بس مش هاين عليك ،، الحب في الله دا بجد حاجه كبيرة اوي ،، ومش عند أي حد حتي لو قال !!
أمل …
يوقظ همتنا…
عمل يرجع نهضتنا
نسعى نحو الغد…
هيا..
لنعيد الفجر…
نمضي لنغير مجرى…نرقى قمم المجد

دعواتكم كتيييييييييييير اوي اوي إن ربنا
” يهديني ويثبتني ويوفقني ويرشدني لإختيار الصواب “
ايه دا مابتدعوش ليه ….يللا دلوقتي

nice

امممممم
الموضوع دا حلو ….هو مش موضوع ….
هو سؤال واحد من الاردن — احنا في مصر علي فكرة — في موقع اسلام اون لاين والسؤال عجبني ،،،
والرد كمان عجبني اكتر ….
وأكيد طبعا مابرميش كلام علي حد …إنتوا عارفين اني وش كدا؟؟؟ !!!!
ملاك من يومي أنا …..
عموما إقرءوا السؤال والاجابة ،، وإن شاء الله يعجبوكم
****
ياريت تدعمونا بأفكار لمدونة i support gaza
المدونة موجهه للغرب ،، بجد محتاجين دعم ،، ولو حد يعرف برنامج تسجيل من علي الكمبيوتر …يبقي مشكور أوي ويبقي ..ج :: ا:: خ

***
sms
أنا أصلا ماأقدرش أزعل منك ….آخد علي خاطري ..آآه
أتنرفز …ممكن ..
بس الضنا غالي يابنتي !!!

لأننا ولأنهم …

لأننا رجال …نساؤنا رجال …ورجالنا رجال …لأننا عرفنا طريق الحق فسرنا فيه ،

لم ننحني ، لأننا نعلم أنهم مهما سجنونا ، مهما إعتقلونا …مهما فعلوا بنا …فنحن ها هنا باقون ،

نرفع راية الحق …خفاقه ، لا نحني جباهنا الا لله وحده ولأنهم لم يفهموا بعد ما نحن بصدده …

لأنهم لم يفهموا بعد أننا لم نعمل لهذه الدنيا …

لأنهم لم يفهموا أخلاقنا …لم يفهموا ديننا

ولأننا فهمنا أننا نتعامل مع أناس لا يفهموننا …

فترفعنا عنهم …

تجنبنا الصدام معهم فكما يقول المثل العربي …شر الأعداء الغبي

ولأن هذا العدو لم يفرق بين إصلاحي ومفسد ولأن هذا العدو ..

لم يعرف العدو لشعب مسكين تحولت فيه الدولة إلي حيوان مفترس تلتهم وتهاجم أبنائه الذين يعملون بكل قوتهم من أجل بنائه ،

لايهتمون بما سيواجههم من إعتقالات من تشريد لأبنائهم ،

لايهتمون بالفصل من أعمالهم ..لا يهتمون بالموت المدني …لا يهتمون الا بالعمل لوطن ..

ولأن خالد حمزة هو أحد الرجال،

ولأنها عدو جاهل تتمثل في حكومة أعمت عينيها عن رجل ذو عبقرية …

خالد حمزة …بشهاده الجميع ، رجل عرف الطريق ، فسار فيه ، فكان مصيره كمصير عديد من الإصلاحيين

خالد حمزة كان مصيره السجن …

الحريه للمهندس خالد …

الحرية لمصر

****

ادعم مدونة المطالبة بالإفراج عن خالد حمزة سلام رئيس تحرير موقع اخوان ويب بالكتابة والأفكار وتطوير شكلها
يمكنك مراسلة فريق دعم المدونة علي البريد الإلكتروني freekhaledhamza@gmail.com

tell me why

حد يتل هم هواي….هما بيقتلوا أولاد فلسطين
حد يتل هم هواي …..في 65 شهيد لحد دلوقتي
حد يتل هم هواي ….حكامنا ولاد ( تيييييييييت ) بالأوي
حد يتل هم هواي …..حكامه ولاد ( تيييييييييييييييييييييييييييت )
حد يتل هم هواي …..إحنا مابنتحركش …
وحد يتل مي بقي …..هو إحنا بننسي بسرعه ليه ؟؟؟

كنت بغزة

أحط الحوار قبل ماأسمعه وأمري إلي الله
الحوار مش شغال عندي
بس عموما …هاحطه …
إسمعوا من غير تريقه لو سمحتوا
ومش معايا التحميل لما ييجي هابقي احطه ان شاء الله
الحوار

أفراح وأحزان

أولا … كل اللي يدخل يقول لبابا كل سنة وهو طيب علشان عيد ميلاده كان إمبارح
ثانيا …كل اللي يدخل يقولي مبرووك علشان طلعت من الخمسة الأوائل في دورة الصراع
ثالثا …كل اللي يدخل برضه يقولي كل سنة وانا طيبة علشان كدا تميت سنة صحافه ، وبقيت سنة تانية )

*******

إمبارح كنت في كلية سياسة وإقتصاد …كان عندي محاضرة ،، تابعه لموديل منظمة المؤتمر الإسلامي وكنت قد إلتحقت به في بداية العام ، كان المحاضر هو السفير سيد قاسمي المصري مساعد أكمل الدين أغلو – رئيس المنظمة – ، ماأعرفش كنت رايحه وانا ناوية نية مش تمام …سودا بمعني اصح ،، بس الحقيقة الراجل كان تمام تمام …كنت متشوقه جدا للمحاضرة ،، رحت لقيت الدكتورة هبه رؤوف هي المرافق بتاع الضيف ،، كنت مبسوطة جدا ،، أول مادخلت قالتلي ” منورة ” ماكنتش عارفه ان ماحدش كان منور غيرها
المحاضرة دي أثبتت إن في أماكن كتييير في العالم فيها ناس مسلمة بس أنا ماأعرفش عنهم حاجه !! حد كان يتخيل إن كوت دي فوار تطلع دولة إسلامية …ولا قرغيزيا …حد سمع عن قرغيزيا دي قبل كدا ؟؟!!!
موقف جميل السفير عمله ، قبل صلاة الظهر بربع ساعه إدانا بريك ، علشان نلحق نتوضي ونستعد للصلاة
أكتر حاجه عجبتني في المحاضرة الحديث عن اليونيفيل الإسلامي …وأكتر حاجه زعلتني بجد أنه قال انه حلم لسه كتييييير لما يتحقق ،، مع إني أعرف إن مصر مشاركة في اليونيفيل بتاع دارفور !!
*******
الحمد لله ، سجلت في إسلام أون لاين ، وإن شاء لله الحوار هينزل بكره أو بعده وهبقي أحط ان شاء الله لينك في المدونة للي عاوز يحمله
وشكر للأستاذ مجاهد والأستاذ باسل ، والأستاذ عبد الله ، ربنا يجزاهم خير علي الجهد وسجعله في ميزان حسناتهم..

******

تحديث الساعه 10 صباحا ، ،عرفت موضوع التأجيل للمحكمة العسكرية ، أنا وقتها شعرت بغصه في حلقي …إفتكرت سارة الصغيرة وهي بتقول الشعر وبتبكيإفتكرت سارة الكبيرة وهي بتكلم والدها بكل عزة وشموخ ووقتها فكرت في حاجه واحده ….إن لحد ما 25 مارس ييجي ….لعل الله يحدث بعد ذلك أمرا …أو يرنا آية من آياته ، أو نري معجزة من معجزاته

وعموما كويس أوي التأجيل علشان ندعي عليهم بذمة …ونقوم الليل ونصوم بذمة ….يجيبوا أجلهم إن شااااااااء الله

*****

إلي نبيلة ملاحي …إتصالاتك تسعدني وتجعل روحي في السماء ، أنت وأخواتك …تعطيني دفعه كبييييييييييرة للأمام لا تقطعيها

زنقة الموظفين آخر الشهر

عارفين لما المرتب بيخلص ، والموظف يبقي نفسه كدا آول الشهر ييجي بسرعه علشان يسد الديون اللي عليه ،، هذا هو حالي الآن ، علي الرغم من أن أول الشهر بتاعي ، مش باينله نهار ،،
يعني شكل آخر الشهر دا هيدوووووم طويلا ويستمر ،،
علشان تعرفوا الي أنا فيه ، تخيلوا ……موظف قاعد في مكتب -ماأعرفش ايه حكاية الموظفين النهارده – وفي ناس كتيييييييييييير واقفين فوق دماغه ، عاوزينه يخلصلهم شغله ، هو دا حالي هذه الأيام
فأنا ياساده ياكرام ،، عندي 32 ملف ..أيون 32 ملف بحالهم مطبوعين عاوزين حد يقراهم ويلخصهم
في أربع كتب ، عاوزين اللي يقراهم برضه ،،
في شغل لويب ، متأخر من أربع شهور ….أي نعم والله أربع شهور ….وسبحان من صبرهم عليا ….بلسم والله

في راجل غالي عليا اوي خالص علي الآخر إعتقلووه ، المفروض يبقي عندي دم وأكتب عنه تدوينة …بس تقريبا مافيش …دم !!…شوفوا دا عجبني أوي


في يوم إتنين مااعرفش هيعدي ازاي ،، من محاضرة في سياسة واقتصاد ، لتسجيل في اسلام اون لاين للمهمة الأكبر والأهم …….عيد ميلاد بابا …وكل سنة وهو طيب علشان ابقي اول واحده قلتها …
شغل في الكلية متلتل …..وشغل أكثر تلتله في الجامعه ….وطبعا الكلية غير الجامعه ،، بحسب دا مفهوم !!

عاوزة أكتب عن تركيا ، وكوسوفو ، عاوزة أكتب عن اللجنة الإعلامية في الحركة النسائية الفلسطينية !!
عاوزة أكتب عن أردوغان ، عن تورجوت أوزال ، عن بديع الزمان ، عاوزة اكتب عن سيد قاسم المصري ، عاوزة أقابل لمياء شرف ، أسماء العريان ، عاوزة أخرج معاها …وأتكلم معاها …..بس مش عارفين و لا حتي فاضيين
حد طيب وابن حلال يتبرع لي ب….24 ساعه …ويبقي ليه الأجر والثواب ….والدعاء طبعا

عموما ….

قول معايا قول بجد …هي عيشة ولا موتة ، ولافوته في حارة سد …؟؟؟؟؟

ونشتاق للبوح أحيانا feelings reveal

ونشتاق للبوح أحيانا …هو كتاب لمحمد عبد الجواد ، منذ فترة لا بأس بها ، لم أقرأ كتابا أدبيا بمثل هذا الجمال … الكتاب يصدر عن دار نشر أجيال ، قال عنه الكاتب ، ” خواطري ،، خواطري التي أكتبها …

أجزاء من كياني … وتفكيري …وخيالاتي ورؤاي …

من يجمعها ..ويجمعني معها …

وأهديه أصدق أحرف فيها ؟؟ ”

هذه هي المقدمة ، فمابالكم بما في الداخل …

كتاب يمس شغاف القلب – حلوة شغاف القلب دي – ))

عموما ان شاء الله هانشر أجزاء من الكتاب في المدونة ، أول ماتلاقوا كتابة حلوة يبقي من الكتاب دا …

وان شاء الله هانشر في الليبل ونشتاق للبوح أحيانا

***********

فقرة من الكتاب ….كانت اول مافتحت اول صفحه في الكتاب وقعت عيني علي الخاطرة دي

قسوة

أعظم إتهام عندما يسيء بك الظن إنسان …وأنت لم تفكر في إيذائه

أضيف أنا حته من عندي ….ولم يعرفك ، ولم يرك !!!

إليهم

عذرا فإن سيوف القوم قد صدئت
وخيلهم لم تعد تستمريء التعبا
عذرا فإن السيوف اليوم وااسفا
تخالها العين في أغمادها حطبا
عذرا فلسطين إن الذل قيدنا
فكيف نبقي عليك الدر والذهبا
عذرا فقومك قد ماتت شهامتهم
وثلم الذل منهم صارما عطب
ا صبرا فما أسود من ذا الليل جانبه
إلا ليؤذن أن الفجر قد قربا .
إن إستضاء بنار الحرب جمعهم
فعن قريب سيغشي جمعنا
غدا نعيد فلسطين التي عهدت
من قبل خمسين عاما دوحة وربا
غدا يعيد لها التكبير تسمعه
أذن الدنا ونعيد الفقه والأدبا
غدا نعيد لها الزيتون نغرسه
غرسا ونزرع فيها التين والعنب
غدا سنقلع منها كل غردقة
ونضرب الهام كيما نقطع الصخبا

soooo busy

...هي ...عملت مدونة ، مش بس هي ، لأ وابنها كمان …ألف مبروك ياطنط ، وألف مبروك ياسي عمورة
وربنا يفك أسر والدك قريبا ان شاء الله

*****

ذهبت مؤخرا الي فرح إحدي قريباتي ، لم يكن فرحا اسلاميا أو علي الأقل محافظا …
بعدها بثلاثة أيام كان هذا السؤال يدور داخلي ..
“يعني ايه بنت محجبه ترقص قدام رجاله ؟؟ “
والحق يقال ، كانوا بالحجاب ….

****
هل جربتم أن تكتشفوا شيئا جديدا ، كان أمام عيونكم طوال الوقت …حسنا مكتبة ماما الرهيبة ، اكتشفتها من أسبوع واحد فقط ،، ووجدت كتابا ممتعا إسمه ” نواقض القياده الحركية في العمل الإسلامي المعاصر ” الكتاب للدكتور عادل حسون ” ،، الكتاب رهيب رهيب بجد ::))
*****
هل جربتم من قبل أن تتركوا عملا لآخر لحظة لتكتشف بعدها أن هذا العمل ليس بسيطا كما تتخيل …جربته أنا عندما التحقت بدورة الصراع والتغيير ، وتركت بعض واجباتي مؤجله لآخر يومين ، لأكتشف فجأة أن هناك نشاطا لا بد من اتمامه ( ، ونشاط ، لن يستغرق أقل من يومين لعمله علي اكمل وجه …ربنا يستر

غزة 2

أنا والدكتورة رشا ، زوجه الدكتور عبد العزيز الرنتيسي

خرجنا من عند أم نضال ..وإحنا ماشيين سارة بتقلها ..” ممكن أطلب طلب هايف شوية عاوزة ذكري “
ياسلااااام سارة دي عسل – مش اوي يعني عسل ممشش – وبالفعل طلعت لكل واحده فينا مصحف
كانت الزيارة التالية لأم محمد الرنتيسي ، زوجه الدكتور عبد العزيز الرنتيسي …والدكتورة رشا الحقيقة ودودة جدا ، كانت بتسلم علينا بحرارة شديده …قالتلي ” أنا مبسوطة جدا ، إنكم هنا ، ومبسوطة انك جاية تزوريني ، أنا أحبك في الله كتيير كتيير “
ساعتها بقي ، كان ايه …ياحلولي ياحلولي …دي بتكلمني أنا …:D
شوية العدد جوه البيت زاد وكان في اخوات كتيير اوي جايين يسلموا علينا وكدا
ماكنش في مكان ، الدكتورة رشا نادت عليا وقالتلي تعالي اقعدي جنبي ، وشالت زهرية كدا من علي الطربيزة علشان اقعد جنبها ….عسل والله عسل :D
خرجنا من عندهم وكان الوقت بدأ يتأخر والجو يليل كدا …كان الطريق ضلمة جدا ، علي الرغم من وجود ضوء السيارة ، لكنه كان بينور جزء بسيط أوي من الطريق ، كان طول الطريق رجاله ، وتحت رجاله دي الف خط …من كتائب القسام ، كانوا شباب صغير اوي ، يعني في ناس منهم ، مايتعدوش ابدا ال 17 سنة ، أي نعم طوال ( جمع طويل ) لكن برضه البندقيات تقيله والصواريخ اللي كانوا ماسكينها أكيد ليها وزن …سبحان الله مش زي اللي عندنا ….آخرهم …تيت تيت تيت …مصر …
دا الحارس اللي زعق في سارة ))

ماعلينا …المهم ، وصلنا عند بيت الدكتور الزهار …كان في شباب واقفين يحرسوا علشان الدكتور الزهار كذا مرة يتعرض لمحاولات إغتيال …سارة واقفه تصور ، دا شخط فيها ….هههههه…البنت كانت هتموت ياعيني ..طب مالاول ياجبانة ..

المهم في الآخر لما عرفوا احنا مين … قصدي أول ماعرفوا ان أروي الطويل معاهم …رحبوا جدا جدا …واستقبلونا أحلي استقبال
أخدوا مننا الشنط ، خوفا من إن يكون فيها أي حاجه ، خصوصا لأن الدكتور الزهار من الأشخاص المكروهين جدا جدا من عند فتح ومن عند الطرف الإسرائيلي …يعني راجل راجل …وماعندوش هزار …ولما يلاقي الموضوع مايل ..بيدخل شمال علي طول …هما اللي قالوا كدا )

أنا وأم حسام الزهار
زوجه الدكتور الزهار كانت متأثرة جدا ، فابنها حسام لسه مستشهد …ماطولناش عندها…
وورتنا سما أول حفيده للدكتور الزهار هو ماكنش لسه شافها لأنه كان في مصر …بنت قمر ماشاء الله وعنيها خضرا ))
خرجنا من هناك علي بيت الدكتور يوسف المنسي وزير خمس وزرات في بعض )
مراته مصرية ، والدكتور يوسف ودود جدا …قعد اتكلم معانا كتيير ، تقريبا أطول مده كانت عندهم
وشهد بنته ادتلي خاتم …أي نعم واااااااسع اوي اوي بس مش مهم شكرا ياشهد
خلصنا من زيارة الدكتور يوسف أثناء التوجه لبيت الأخ منذر – مضيفنا – مررنا من علي تبه ( هضبة ) عاليه مليانة شجر زيتون ، الحقيقة كان منظر أكثر من رااائع كانت الكيبوتسات – المغتصبات – الصهيونية منورة من بعييد وكانت الدبابات الصهيونية تتجول في مساحه من الأرض تم تجريفها علشان يمسكوا أي متسللين والحقيقة عدد الدبابات كان كبير ، وماكنتش أعرف إن اليهود قريبين اوي كدا من غزة …الجو كان برد أوي أوي ، بس الواحد خلع الجاكت ، وعنيكوا ماتشوف الا النور …برد مازال مستمرا الي الآن ولكن …ما أحلاه من برد…
كان شعوري وقتها إني عاوزة أجري وسط الشجر دا ، يعني علي الرغم من الاحتلال والدبابات ، بس الجو مايتوصفش ،
بس وقتها افتكرت أبيت شعر جميلة اوي بتقول
ما أروعك …!!
رفع الجميع الراية البيضاء من زمن ، وأنت بقوة ،
مازلت ترفع إصبعيك ومدفعك ،
ذهب الجميع إلي مخادعهم وناموا بينما ،،
لم تغف أنت للحظة ،
وبقيت تهجر في الليالي مخدعك !!

طول مااحنا فوق كنت بردد فيها ، ماأعرفش ايه …يمكن لأنه فعلا …ماأروعك ..
ومااتحركناش علشان نمشي الا لما اتصلوا بينا لأنهم قلقوا ، فالمسافه بين بيت الوزير وبيت منذر قريبة لا تستحق الوقت الطويل دا
كان المفروض نروح قناة الأقصي ونعمل هناك لقاء بس للأسف مالحقناش لأن الوقت كان إتأخر وكان لازم نمشي
واحنا مروحين أم خليل قعدت تعيط علينا جامد وكانت زعلانة أوي إن احنا ماشيين ، ربنا يكتب لنا لقاءا قريبا قريبا ان شاء الله
طبعا أنا وسارة طول الطريق نايمين …حقنا …مانمناش من يومين ..
بصراحه كانت أحلي حاجه في الزيارة دي هي الأخوات اللي هناك
نبيلة الملاحي ، نادية أبو سالم ، ام حمزة ، أسما ، أم عمر ، دعاء وأميرة ، ريم ، وسماح المزين ، أم حذيفة ، هدي ، وروح قلبي التي لم أرها ولم يكتب الله لنا لقاءا بعد فداء المدهون
…::”ساكنوا الروح أشعلوها حنينا حين أطفأوا اللقاء وراحوا “::…
أحيانا تكون هناك أحداث أكبر من أن ترويها أو تحكي عنها ، هناك أشخاص لا تستطيع أن تكتب عنهم لم يحدث لي ذلك الا مرتين ، عندما قررت أن أكتب عن أبي وعندما قررت أن أكتب عن غزة وأخواتها ..
أدعوا الله لنا لقاءا قريبا جدا جدا
اللهم آمين

إعتذار …توقف ..نعي

في البداية …إعتذار لمن أكتب عنهم …
إعتذار لأهل غزة …
عما صدر ، ربما هم يعرفون أنه لا يمثلنا ، ولكن أعتقد أنه واجبنا أن نعلن …
” أحمد أبو الغيط لا يمثلني أنا علي الأقل ” …
” اشداء علي المسلمين …رحماء علي الكافرين ”

الأمر الثاني …أعتذر لكل من ينتظر الجزء الثاني من رحلة غزة …لظروف إنشغالي الشديده …
” وآدي جزاة من يؤجل عمل اليوم الي الغد “

الأمر الثالث …أنعي بكل أسي الأستاذ العظيم مجدي مهنا ، وربما منذ زمن طويل لم أحزن علي شخصية عامة مثلما حزنت علي مجدي مهنا

” غفر الله له ، وأسكنه فسيح جناته ، وكفر عنه ذنوبه وأبدلها بحسنات ”

أولا : طبعا إعتذار شديد لأني مابعرفش أحكي أوي علي الرغم مما هو مفروض إني أكون كاميرا أصور وأحكي كل حاجه ..بس مين قال إني صحفيه شاطره ، الحاجه التانية انا مش كل حاجه كتبتها عموما ممكن تروحوا لسارة هتلاقوها قالت كل حاجه مش بعيد تقول أنا ربطت رباط الكوتشي كام مرة

نبدأ بقي …صلوا ع النبي …

الحقيقة أنا لحد دلوقتي مش مصدقه إني رحت …سبحان الله اللي بيصبر ربنا بيديله حاجات أحلي وأجمل من اللي هو كان بيحلم بيها …

من شهرين أو تلاته كدا كنت كتبت بوست غريب شوية ، كل الناس كانت بتسألني عن معناه وإذا كان فعلا زي ما هو مكتوب كدا ….

الحقيقة أنا كانت جاتلي زيارة لفلسطين ، وكان من ضمنها زيارة للمسجد الأقصى …وسبحان الله بابا وافق بسرعة غريبة ، و ماما برضه وافقت بسرعة أغرب ، كان عندي مشكلتين …أولا التأشيرة لازم تطلع من سفارة الكيان الصهيوني وأنا كنت كارهه للموضوع دا جدا …..الحاجة التانية إن محمود أخويا كان عنده امتحانات وبالتالي لا يتوفر محرم فالموضوع وقف علي كدا ….كنت فعلا زعلانة جدا جدا …..وماكنش تفكيري غير في إني مارحتش ومش هروح ….

يوم 1\1 عرفت إن عمو عبد الحميد راح غزة …وهكذا اتصلت بيه …وقعدت أزن وأرجوك وبليييز وعلشان خاطري ، قال ماشي آخدك بشرك تلمي كذا …وقال مبلغ كبييييييييير من أربع أرقام ، قلت ماشي وسبحان الله في ساعه واحده بس ، لمينا تبرعات بضعف المبلغ اللي هو طلبه بمرة ونص ، كل اللي كان يعرف إن في حد رايح غزة ، يتبرع بكل حاجه عنده والله أعرف واحده أستلفت مبلغ كبيير علشان تتبرع بيه

الساعه 1 في الليل كدا ماكناش لسه مشينا ،اتصلت بيا سارة قالت أروي ممكن مانروحش العريش متقفله خالص ، أنا اتصدمت بجد ، قلتلها يعني ايه متقفله ، نروح وربنا هيسر ان شاء الله ….وكنت فعلا حاسة انني ممكن أنهار لو قالت مش رايحين خبطتين في الراس توجع

وفعلا مشينا ، وإحنا 90 % هنرجع ومش هنعرف ندخل غزة ….لكن سبحان الله ، عدينا علي ييجي 40 وحده تفتيش من ساعه ماخرجنا من البيت الي وصولنا لمعبر صلاح الدين ….وربنا كان ميسرها تيسييير مااعرفش ازاي …كان معانا بلاوي في الباكآج بتاع العربية ، الراجل يفتحها ويفتش كدا ويقول عدوا …أبص كدا وأتنح …يابني بص كويس نعدي ؟؟؟ في سري طبعا J

أي نعم الرخص اتسحبت مننا علي الطريق ، بس مش مهم …فعلا ما فرحتش إني في غزة الا لما وقفت أتصور علي الجدار الفاصل أنا وسارة ….كنت فعلا طايرة من الفرحه ، أقلكم كنت طايرة من الفرحه ؟؟ الحقيقة أكتر …

رحنا عند ناس ( عارفين طبعا إن إحنا رايحين من قبلها ) والله استقبلونا استقبال حافل ، فعلا ولا كأننا أهلهم اللي بقالنا سنين ماشفناش بعض …..واحنا مروحين أم خليل قعدت تعيط علينا ….وماكنتش عاوزة تخلينا نمشي ..والصبح كانت عماله تأكل فينا ، وغلبت ماما والله في سرعه السكب في الأطباق ، حاجه فعلا مش ممكن

سبحان الله ، زيارة خلتني أتأكد من نظريتي إن سايكس بيكو إذا كات علي الورق فهي مش في القلوب ،

لما رحنا المسجد علشان نصلي الجمعه ، كان المسجد كله ملوم علينا يسلم ، وكانوا فرحانين أوي ان في ناس رايحين يزوروهم ..

فوق مبني الشابات المسلمات بغزة

قابلنا عدد كبيير من الأخوات الحمد لله القعده فعلا كانت حلوة جدا ، ربنا يعينا ويعينهم ، أجمل ما حصل بعد كدا مقابلتنا مع أم نضال ، الست دي حنونة جدا جدا جدا ، بجد ماشاء الله عليها وهي بتسلم كدا تحس أن في عاطفه غريبة ، أول ماوصلنا عندها كان الوقت مغرب وكان آدان المغرب أدن وماحدش صلي ، ودخلنا علشان نصلي وماكنتش هي لسه جت وكنت أنا اللي بصلي بيهم ، لقيت دي دخلت وبتصلي ورانا ، كنت محرجه كدا ،، كنت عاوزة أقلها أستني ياحجة أنا ماأستهلش والله يعني الواحد كان مكسوف أوي ..أنا اللي أصلي بدي كتيير عليا والله ..

أنا وبنت الشهيد نضال

بعد كدا أم نضال قعدت تتكلم معانا كتييير ، وعملنا معاها حوار ، بجد ماشاء الله عليها يمكن هي من أكتر الناس اللي أثروا فيا أوي في الزيارة دي وسارة بنداري قعدت تعيط عليها …لأ حونينة

اكمل بعدين ….:)

في غزة

أنا وأم نضال علي ضوء الشموع

أنا كنت في غزة …أيون أنا …بذات نفسي ،، صدقوني مابهزرش ….

أنا رحت غزة ،، وشفت أم نضال ،، وقعدت مع أم محمد الرنتيسي ،، ورحت لأم حسام الزهار …

أم نضال أدتني مصحف ….وكتبت عليه كلام حلو أوي ..
الست دي ماكنتش أحلم أني اقابلها بجد …

قابلت ست تانية ماأعرفش اسمها ايه …أم لشهيدين وعندها ستين سنة وبتقف مع المرابطين علي الجبهه …

قابلت لبيبة …واحده مخلصة أوي اوي اوي ، من الشابات المسلمات …( اللي هما مكان الأخوات المسلمات يعني )

أنا مااعرفش ازاي احنا دخلنا القطاع …كل اللي راحوا في اليوم دا رجعوا …

وكل اللي راحوا بعدنا رجعوا ….

احنا بس اللي دخلنا …

أحكيلكم لما أخف والنت كمان يخف لأني مريضة جدا جدا جدا ….

دعواتكم بقي جامد أحسن أموت قبل ماأقلكم اللي حصل وتبقي مشكلة
)))

هحاول أحمل بقيت الصور علي فليكر لحد ماأكتب باقي البوستات

لماذا لم تعد الأناشيد تحمل ذلك الرونق القديم ؟؟
أصبحت أكثر حداثه ..
تحمل موسيقي ، بأحدث الأدوات ..
تغير التوزيع ….فأنشوده “إن للإخوان صرح ” الهادئه الوقورة …
تحولت الي شيء ما …لا أنكر جذابة وظريفه ….
ولكن القديمة أحلي !!!
أنشوده أيا مركز النور …كان رائعا ….
لكن تغير هو الآخر جميل ايضا … ولكن القديم أحلي وأحلي ..
أهو خلل أصاب طبلتي أذني؟؟ ….ربما …
فقط أشتاق لأناشيد قديمة عذبه …بلا موسيقي …
أناشيد أفتخر بطابعها الاسلامي ..ببصمتها الرائعه المميزة !!
أناشيد هادئه ….أستطيع تفريقها عن الأغاني ….
حتي لو كانت هذه الأناشيد تتغني بحب الله